اسلام آباد۔17نومبر(اے پی پی) وزیر اعظم محمد نواز شریف ترک سرمایہ کاراں اتے کاروباری شخصیات کوں دعوت ڈتی جو او پاکستان اچ کاروباری دوست ماحول توںفائدہ چیندیں ہوئیں توانائی،بنیادی ڈھانچے،زراعت سمیت مختلف شعبیاں اچ سرمایہ کاری کرن۔انہاں اے گالھ خمیس کوں اتھاں سرمایہ کاری بورڈ پاروں ترک سرمایہ کار گول میز کانفرنس نال خطاب کریندیں ہوئیں آکھی۔ایں موقع تے ترک صدر طیب اردوان وی موجود ہن۔وزیر اعظم خصوصی طور،پاک چین اقتصادی راہداری منصوبہ دا ذکر کریندیں ہوئیں آکھیا جو ایں وڈے منصوبے دے تحت46ارب ڈالر دی سرمایہ کاری تھیندی پئی اے۔انہاں آکھیا جو راہداری نال وڈے پیمانے تے صنعتی پارکس بنڑائے ویندے پئن،اساکوں یقین اے جو ایں نال پاکستان اچ بے مثال تجارتی اتے صنعتی سرگرمیاں زور پکڑیسن۔انہاں آکھیا جو چین پاکستان اقتصادی راہداری گوادر کوں شمال مغربی چین اتے وسطی ایشیائی ریاستاں اتے افغانستان نال ملیسی،اساں چاہندوں جو ترکی وچ جیڑھے ساڈے دوست ہن او ایں اقتصادی ترقی دے پروگرام دا حصہ بنڑن۔انہاں آکھیا جو سرمایہ کاری بورڈ ترک سرمایہ کاراں کوں ایں بارے اچ بھرپور رہنمائی ڈیسی۔وزیر اعظم آکھیا جو ملک اچ کاروباری سرگرمیاں دے ودھارے سانگے سرمایہ کاراں کوں کئی مراعات اتے پرکشش موقع پیش کیتے ویندے پئن ۔
