اسلام آباد۔24نومبر(اے پی پی) وفاقی وزیر داخلہ محسن نقوی آکھیے جیڑھا وی انتشار کھنڈیسی اوں کوں گرفتار کیتا ویسی ، غیر ملکی مہماناں دی آمد دے موقع تے انتشار کہیں صورت قابل قبول کائنی ، حکومت تڑیاں توں ݙرݨ آلی کائنی ، وزیراعلی کے پی وفاق تے چڑھائی دی بجائے صوبہ اچ امن و امان تے توجہ ݙیوں ۔ ڈی چوک دورے تے میڈیا نال ڳالھ کریندے انھاں آکھیے ساݙی کوشش اے جو احتجاج دی کال دے دوران اسلام آباد دے شہریاں کوں گھٹ توں گھٹ تکلیف ݙتی ونڄے ، حالی فارن وفد اسلام آباد پڄدا پئے جݙاں جو کل بیلاروس دے صدر وی پاکستان دے دورے تے پڄدے پئن ، فارن وفد دے روٹ دے رستے اچ احتجاج کرݨ آلے مظاہرین کوں پولیس گرفتار اتے منتشر کرݙتے تے انہاں دا روٹ کلیئر تھی ڳئے ملک اچ موبائل فون سروس چلدی پئی اے ، حفاظتی تدابیر دے طور تے انٹرنیٹ کہیں حد تئیں بند کیتا ڳئے ، ڈی چوک دی آئی جی اتے ڈی آئی جی خود نگرانی کریندے پئن ۔ انھاں آکھیے گزریل احتجاج دے مقابلے اچ ایں واری شاہراہواں کوں گھٹ بند کیتا ڳئے احتجاج کرݨ آلیں کوں وختی گرفتار کیتا ویسی ۔ انھاں آکھیے ایں احتجاج توں مالی ضیان تھیسی احتجاج دے بعد ایں دی تفصیلات عوام دے سامݨے رکھیسوں تاں جو انہاں کوں حقائق پتہ ہوون ، سوال دے جواب اچ محسن نقوی آکھیے کہیں وی قسم دی شرانگیزی توں بچݨ سانڳے اساں وفاقی دارالحکومت دا تحفظ کرݨا اے، اساں کنے ھک آپشن اے ہے جو مظاہرین کوں اجازت ݙتی ونڄے تے او اتھاں آتے ٻہہ ونڄن جݙاں جو ݙوجھا آپشن انھاں کوں ایں توں باز رکھݨ اے اساں اسلام آباد کوں محفوظ بݨاوݨا اے اساں تڑیاں توں ݙرسوں کائناں ، ایندا پی ٹی آئی کوں کوئی فیدہ نہ پجسی ۔ کرم دی صورتحال تے ھک سوال دے جواب اچ انھاں آکھیے اتھاں ایں ویلھے وی حالات چنڳے کائنی ، وفاق ایں سانڳے ہر ممکن قدم چیندا پئے تے صوبائی حکومت نال تعاون کریندا پئے ، کاش صوبائی حکومت وفاق تے چڑھائی دی بجائے اتھاں ونڄ تے صورتحال کوں سنبھالݨ دی کوشش کرے ۔ وزیر داخلہ آکھیے اسلام آباد ہائی کورٹ دے فیصلے دی روشنی اچ پی ٹی آئی دی قیادت نال رابطہ کیتے تاں جو انہاں دا کوئی جواب نی ملیا ایں ویلھے پنجاب سودھے ݙوجھے صوبیں اچ احتجاج دی کوئی اطلاع کائںی آئی ، صرف خیبرپختونخوا اچ احتجاج سانڳے لوک نکلئن ، انھاں آکھیے احتجاج کرݨ آلے آپݨی جاہ تے حکومت اپݨی حکمت عملی بݨیندی پئی اے میڈیا کوں ہر مہینے اسلام آباد تے چڑھائی کرݨ آلیں توں ایندا مقصد ضرور پچھݨا چاہیدے، اے ہر اہم موقع تے جݙاں کوئی عالمی سرگرمی اتھاں تھیندی اے ، احتجاج دی کال ݙیندن جیں تے انہاں دی نیت تے شک تھیندے۔ اساں احتجاجی مظاہرین اچوں افغان شہری وٹھیے ، پی ٹی آئی توں پچھیا ونڄے جو او ٻاہرلے عناصر دے ٻل بوتے تے اے احتجاج کرݨ چاہندن ، انھاں آکھیے نیکٹا دی طرفوں دہشت گردی دے خطرات دے حوالہ نال الرٹ توں صوبائی حکومت کوں ݙسا ݙتا ڳئے۔
.jpg)
